عيـــــــد ميـــــــــــلاد - بشرى إبراهيم

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

عيـــــــد ميـــــــــــلاد - بشرى إبراهيم

مُساهمة من طرف Eltyeb Elsadig في الأحد ديسمبر 04, 2011 3:41 pm

انا من زمنا خدو مشلخ
وهى من ازمانا خدها ساده
اتعجبت سماحا مواتر
طبقات عالية وكلها ساده
وكانت بينا فوارق شاسعة
اتعارفنا
وكانت جاده
وقالت عيد ميلادى الشهر الجاى
ولازم تحضروا
قتلها خير
قتلهاخيييييييييييييييييييييييييييير
ودخل فى اضافرى
تقصدى ايه بى عيدميلاده؟
ايا ربى اتولدت يا دابا؟
يبقى الاعياد سوها زيادة؟
امكن ولدت واناما عارف؟
يمكن ميلاد عيسى واجدادها
يا ربى بدقوا الدلوكة؟؟؟؟؟؟؟؟؟
وبعزموا الحلال كالعاده
بس قتلها خير وانا جاييكم
وعديلة وزين
والشهر الجاى
مرق مركوبى من السحارة
داقاهو المطرة قبل شهرين
ونكت طاقيتى من العضاضة
سليتلى ثماد رقعتها زين
سديريتى ابوى مسويها لبد
فرتقت اللبده مرقتها طين
عراقى مغزوز فى الكوكار
كان سوهو وقاية وكت فازعين
سروال مدفون فى رهل العيش
ملفوف محشور بين شوالين
لميتن واديتن شطفة
شريتن فووووق فى زريبت الزين
والزين بقراتو مكوفرات تب
مدغن طاقيتى هرنها زييييييييييييييييييييييييييييين
شافتن السرة بت الهراف
طردتن وجابتن لتاف
وغضبت غضب
وعزمت اقوم
جفن ما جفن
اقوم فى الحين
مرقت ووشى مطوطو تب
وصتنى الحلة رجال وعوين
وصتنى ام نوفل لى كركار
كان تلقى ودك جيبلى رطلين
وقروشى حلف صرة وبى خيت
وصتنى حليمة بت العجبين
سروال لى محمد ورطلين بن
بنبيعلنا شي ونديك بعدين
وصانى الهابر لى مركوب
مخلوفة وسرج وكرباجين
عنقريب وموسر بى حبال قد
تيبار ومسلة وابريق طين
والناس بتوصى وغبيانة
والناس غبيانة وبتوصى
وانا ظرفى مكدر زى الطين
وبتوصى وزى بايعلى بعير
وانا بايع تيسى وعيش كيلتين
والتيس اعور ما جابلو سعر
والعيش بتاب ومسوس وشييييييييييييييييين
تتسود ختوة هالسفرة
انا ماشى لواجب اقوم بالدين؟؟؟؟
وركبت الباص مخلاتي دفس
كدوسي وحقـتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانامعروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات
شايلات هديات
وحدات وردات
وحدات زهرات
شايلات رسمات في شكل ارنوب
واسود ونمور ... سبحان الله زي الميتات
يضاحكو قـر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملـّص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخدجبدات
وانا بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماءولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاهاضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه
وادرج عاصفة اللقدة السخيه

--------------------------------------------
منتديات التوثيق الشاملtawtheegonline.com
avatar
Eltyeb Elsadig
عضو مجلس الإدارة
عضو مجلس الإدارة

عدد المساهمات : 145
تاريخ التسجيل : 19/11/2011
الموقع : Alhasahisa

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: عيـــــــد ميـــــــــــلاد - بشرى إبراهيم

مُساهمة من طرف ود شيخ العرب في الإثنين ديسمبر 19, 2011 7:32 pm

ابدع فيها بشري والله
كل العالم اتكيف منها
حتي الرئيس جابت خبرو
تكرم يا اصيل

ود شيخ العرب
عضو جديـــــــــــــــــد
عضو جديـــــــــــــــــد

عدد المساهمات : 1
تاريخ التسجيل : 19/12/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: عيـــــــد ميـــــــــــلاد - بشرى إبراهيم

مُساهمة من طرف Alshoukry في الإثنين ديسمبر 19, 2011 10:51 pm

حقأً أبدع فيها الشاعر الكبير بشرى إبراهيم؛ لما لديه من ملكة شعرية فذةٌ و خيال متقد.
تقبل مروري
avatar
Alshoukry
المديـــــــــــــــــــــر العـــــــــــــــــــــــام
المديـــــــــــــــــــــر العـــــــــــــــــــــــام

عدد المساهمات : 169
تاريخ التسجيل : 18/11/2011
العمر : 26

معاينة صفحة البيانات الشخصي للعضو http://albutana.mountada.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى