مجادعة بيني وبيت الشاعر (كمال المرضي )

اذهب الى الأسفل

مجادعة بيني وبيت الشاعر (كمال المرضي )

مُساهمة من طرف بت الخدر في الجمعة ديسمبر 09, 2011 9:51 pm

بيني وبين ابوي كمال المرضي



المرضي

إنسرف القلب بي الشوق وبشتن حالي

ونوسر جرحي في كامل عضاي وححالي

لي الزول التركني علي سخيم أوحالي

ياهو البي نميمي وبوحي كان أوحالي



بت الخدر



وانا يا خلا ليه معشوقي نافر وسالي

لا كان لي ونيس لاضقت ضحك وتسالي

حسسا فيني والع ومافي زول حسالي

حج البيت وعمره وصومي مانسالي



المرضي



والغنيتلو يارفقايا ماغنالي

والغنيتو من البيا ماأغنالي

سويتلو السمح عسلن يدفق حالي

ومنو قساوة الروح والمرارة منالي



بت الخدر



طابق كيو جوة ضلوعي مابرتالي

شايلة همومي يوت متل التقول عتالي

الخلاني صابرة وحارسة شيتا تالي

خابراو مهما دار مابواتي زي امتالي



المرضي



والريد يارباعة أديتو ماأدالي

وأهديتو النميم بي الشوق نويح أهدالي

بنيتو حرف حرف بيت الغرام هدالي

وديت ليهو زين في زين وشين ودالي



بت الخدر



اوفيت في هواو لكنو ما اوفالي

يعذب فيني عباي الحزن كفالي

النساني لفرضي وجميع انفالي

غارز نابو في قلبي ومشوم فالي



المرضي



الموجعني كان حافظ سريرتي وحالي

عارف ظرفي في ساهلي القريب ومحالي

أستحملتا قسوة قلبو فوق أحمالي

غير رايو من خارطة نظامو محالي



بت الخدر



وجعا فيني يالليل ما هدأ وخفالي

ولامتين الظروف تعطف علي ترفالي

المن فرقو ساهر مايقي مارفالي

طابل قلبي بي ظلمو وحكم اقفالي



المرضي



عاد أناشن أقول ياالبي الدرر تاحفالي

وباقية بنيتي في نمي وحقيقة فالي

في جبل الكلام سمحةوصف شارفالي

يعودك ربي بي الخير والزمن يصفالي



بت الخدر



سنّادي وغتايا.... اللي النقيص تمالي

ساعي دوام مناو ...يتحققن امالي

الحافظني في غيابي وعقب حامالي

ابوي المرضي بفداو بي رويحتي ومالي



المرضي



عاد يابنية عودي لو الظروف ترتالي

وهمي وغمي والسقم العلي يختالي

ياسحاب البخات الفي سماي توتالي

عودي عشان يفوت وجع النوي المتالي



بت الخدر



عباي الـــــوجع كالو وردم عبالي

وهمي وحزني خلن زهري زابل وبالي

جايالك مهرولة يالدوام في بالي

سبقتني الحروف وصلت عليك قبالي



المرضي



عودي وغيري الحال من كتير إهمالي

وشوفي زمن صفاي الأصلو ماإهتمالي

اللخبط صفا فكري وجليل أعمالي

عالجي طشاش عيونن لي البصر أعمالي



بت الخدر



الشفق علي امي وابوي واخوالي

لي كمين زمن متبدلات احـــوالي

الخلاني ساكتة ومادليت اقوالي

نمك ابوي كمال خفف علي اهوالي



المرضي





عودي وغيري الحال من كتير إهمالي

وشوفي زمن صفاي الأصلو ماإهتمالي

اللخبط صفا فكري وجليل أعمالي

عالجي طشاش عيونن لي البصر أعمالي



بت الخدر



النصيتلو شعري ونمّ جاد نصالي

شوقي وريدو ليه فارضات عليهو وصالي

الحارقني شوقو وهاري قلبي وصالي

في قولو ومحبتو بوي كمال خصالي



المرضي





أنايابنية دستور الغرام أومالي

قال لي شوف حبيبك في السمح كيف مالي

عنب الذوق من الشخلوب فتح رمالي

ماقالي لي شجن أعماقي مالك ومالي



بت الخدر

قاد رسن النضم قاصد بلودي رخالي

ودون كل الخلوق امهر كلامو سخالي

المن حنو دفقلي الحنان ضخالي

صندل قولو فاح من طيبو جاد بخالي



المرضي





كورك لي فرح روحو وفتق عمالي

زاد ضي عيني شوف طرفو القبيل أعمالي

فتش دفتري وشاهد جليل أعمالي

قال لي خش سريرتك جوووه ماتعمالي

بت الخدر

الخاطر انكسر حتى الزمن سبالي

زاد المي وشقاي وماخابرة شن خبالي

انا يا ابوي كمال نسمك وكت هبالي

زال البي جت حلل قيود اكبالي



المرضي





أنا ياالرايقة حومتك في البلد واحشالي

تسرف قلبي بي شوقك تشيل تحشالي

ليك أنا في مطار العودة شايلو مشالي

لابس عمتي وجلباب مرقتي وشالي



بت الخدر

انا ياابوي كمال دونت ليك مقالي

وجاياك استريح في ضلك القى مقالي

الخلاني ساهرة وسارفة دمع امقالي

حاكمة علي ظروفي وبالحزن دامقالي



المرضي





ومنتظرك قريب بي الله عودي تعالي

أقدلي أسمي فوق كل البنات إتعالي

ياكي النمة بي حرفن ظريف ماتعالي

وياكي الصيد علي حقل القصيد راتعالي

بت الخدر
عضو نشيـــــــــــــــط
عضو نشيـــــــــــــــط

عدد المساهمات : 6
تاريخ التسجيل : 04/12/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مجادعة بيني وبيت الشاعر (كمال المرضي )

مُساهمة من طرف Eltyeb Elsadig في الجمعة ديسمبر 09, 2011 10:48 pm

شعر سلس رقراق سهلٌ , مع المحافظة على خصوصية هذا النوع من الشعر . لقد برعت كمابرع والدك "كمال المرضي" في مضمار واحد
لك التحية

_________________

avatar
Eltyeb Elsadig
عضو مجلس الإدارة
عضو مجلس الإدارة

عدد المساهمات : 145
تاريخ التسجيل : 19/11/2011
الموقع : Alhasahisa

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى