مجادعة بيني وبين المبدع فجاخ

اذهب الى الأسفل

مجادعة بيني وبين المبدع فجاخ

مُساهمة من طرف بت الخدر في الجمعة ديسمبر 09, 2011 9:57 pm

فجاخ

عفيف طبعه وجميل طرفاً معذب ناظرو

وضياً خافي لي البدر البديعه مناظرو

انتي القافله بيبان المعاكي يهاظرو

عشوقك باكي ماهجس المنام في نواظرو


بت الخدر

بريد الحكمو ماش فوق لي وكيلو و ناظرو

بريدو البهدل العلماء وباهبو يناظرو

سلاح نوويهو من قلب العشوق مو حاظرو

هدَّ حصونو شلع طوبو دك كناظرو



فجاخ

سلاااااام بت التلوب رجاله موهن أقله

في العركه ام لبوس شمس الله ماهن أهله

حباب المابتكوس تمرق تفر بالحله

لابتنقل حديس لا أتزرزرت فوق زله




بت الخدر

حت اهلك تلوب من ذات ونفس الملة

ياركازة البيت ياســــــــند لي القِلة

ان فرزو التلوب آبلقو فوقكن عِلة

انتو اخواني ناسي ولي افضل خلا





فجاخ

كملتي العلم لابساهو تاجاً حله

سريعة نهمه قبال السروج تدله

دكاكر أبواتك الجلن بخلفن شله

كرين منها وعقبان نقول ياااااااااا الله


بت الخدر



اداك الله من حسنو وتبارك وجلة

واتواضعت زيين فوق خلقو آبتتعلة

الفارس الاصم يوم العجاج اب تلة

من ضربت مخالبك لا نفر لا جلة





فجاخ

داك الليله سامع بي سخاكي الخاتم

ومن غير البزار في الجوده ماسمع شاتم

كفك سارية الليل ام سحابا عاتم

كرما علا عند فارس البرامكه وحاتم


بت الخدر

الي سري دايما باقي حافظ وكاتم

ياك رتينة الليل اب سواداً غاتم

العاجبني فيك فارس الجرارق الحاتم

بي سوطين عنج شبعت عولو مآتم



فجاخ

رسمك فالق الحبه وعديل صباك

وايضاً بي جمال ليله وزليخه كساك

يارمز الوجود كل النفوس تهواك

اصلك فتنه مولاي لي العباد سواك



بت الخدر

جلاك الاله فوق البشر علاك

ومن جملة جمال يوسف قسم واداك

طبعّ فيك خُلق ودون الخلوق خصاك

بدّع فيك آفجاخ وساك ملاك



فجاخ

ياالقدرك متل ضي النجوم اتعلا

وطبعك منو كان ماذاد اكيد ماقلا

ياقمر العشاء الدورينو تمن وهـلا

ماإحتر في الجمال احترت كيف هو إدلا




بت الخدر

محياك في القمر خاتف باهو واتجلا

ونورك ضاوي في الليل اب دماساً حلا

ايدك عينة الضحوي اليباسو انبلا

قدر مانجيب حرف ياالدخري فيك بنِزلا





فجاخ

عندك عندي عزه وإحترام يا النيه

وعندك عندي شوقن فاضحه ليك عينيه

عندي عليكي قلبن أرأفيبو شوووويه

في شان إنتي فيهو وإنتي كل ماليه


بت الخدر

عندي النادره افعالو وكلامو شويه

و لدً كابي فوق عرضو ونترتو قويه

رجالً في المحاصه بخافو لوم النيه

فجاخ في الدواس سالن ضرب كميه



فجاخ

الامقالها لي روس المنام حلاقه

كملا خالقه ارداف والضمير واخلاقه

الخلا رويحتي هايمه وبي الهويد حلاقه

قوامه جنيب ويلاكد في القديم كلاقه



بت الخدر

نامو الخلوق وانا رمشي تب مالاقا

نجمني البريدو والروح دعت خلاقا

بعــدني السفر منو وحرم نتلاقا

قابض قلبي الا لساني فيهو طلاقا



فجاخ

ياقمرية الليل الابيتي تروقي

اسقيتيني من مر الدوام بضوقي

عاشقي الليك ماكملن فواتير شوقي

ريدك جاري في دمي البيملى عروقي



بت الخدر

الليل تب برد نسامو هبهب فوقى

الغنا والنميم سجع القمارى تقوقى

من يوم الفراق جهزتا لى واسوقى

شرانى الغرام باع قلبى خرب سوقي



فجاخ

عشوقي الليمو قاسي ومنحجر في خدورو

عالي وغالي فاق بدر التمام في دورو

نويح الليل على العبكن روايح افدورو

صبح حالتي ذي الراح وعاجه فدورو


بت الخدر

الحظ السمح ياخـــــلا كايسة بدورو

ينور واقعي يسعد قلبي يضوي بدورو

النور وشو زي بـــدر التمام في دورو

بعدني القدر منو ولـــــــعب بي دورو



فجاخ

انافجاخ قرع جرف الجنون فقاهو

طايق اساور العقل الكرد عقاهو

ربي تجلي في مضغو القبيل شقاهو

خت ختمو الصمامه وبالوقار سقاهو



بت الخدر

وانا بت الخدر خيل الدواس سابقاهو

طابقة الكية للعدو والشكر حقاهو

ضيف الهجعة بكل هوشة بتلاقاهو

والعادني فجاخ الهرب فقاهو

بت الخدر
عضو نشيـــــــــــــــط
عضو نشيـــــــــــــــط

عدد المساهمات : 6
تاريخ التسجيل : 04/12/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مجادعة بيني وبين المبدع فجاخ

مُساهمة من طرف Eltyeb Elsadig في الجمعة ديسمبر 09, 2011 10:56 pm

الأخت "بت الخدر:
لست بناقد أدبي, ولكن حدسي جذبني لأبياتك , أنت تمتلكين ملكة شعرية فذةً , وهذا ليس إطراءً البتة.
نشكرك على المشاركة

_________________

avatar
Eltyeb Elsadig
عضو مجلس الإدارة
عضو مجلس الإدارة

عدد المساهمات : 145
تاريخ التسجيل : 19/11/2011
الموقع : Alhasahisa

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى