مجادعة بيني وبين الشاعرالمبدع يس الشكري

اذهب الى الأسفل

مجادعة بيني وبين الشاعرالمبدع يس الشكري

مُساهمة من طرف بت الخدر في السبت ديسمبر 10, 2011 5:55 pm

الخنساء بت المك

عاشقي الفيهو خصايلا بالسماح مطبوعا
مالي العين ..وطبعو حنين ..وبيهو قنوعا
المن فرقو عيني اسرفت في دموعا
حروفـــــــا غير مجارتو بنشوفا جزوعا


يس الشكري

عاشقي الفيهو صوت قمري الليالي سجوعا
من ريدو اكتفيت سمت النفس مبيوعا
عشان الجيدو زي جيد الغزال مفدوعا
اصلو جميل وطبعو أصيل ومويتو نقوعا


بت الخدر

عاشقي البشبه الفي اتنين بضربو سبوعا
ريتي الليهو هادي الواسعة آبتسوعا
الخلاقو بدع صورتو ضوا ربــــــــوعا
مابوفيهو حقو وشكرو بي مربوعا


يس الشكري

راسية وثابتة ماها ملقًطة ومخلوعا
مصفرة في الضمير لامن تهوي ضلوعا
ايا ميادة كان شفتي البحور ونبوعا
عينها الحور وعدمانة الخصر منزوعا


يس الشكري

في البلد الكبيرة وكل نواحي ربوعا
مالقيتلك مثيل يا الجاهلة داب ويفوعا
اكان الحي لطف يس تبع متبوعا
يبقى سعيد وفي الدارين حكايتو منوعا



بت الخدر

زولي الفي القلب خلا العقل متبآلد
قالس جسمي بي نيران غرامو وجآلد
أمو حنينه راضية عليهو حتى الوآلد
ريدو فريضه ياخلاي و جواي خآلد


يس الشكري

زولي الحر نسب من امو كان الوالد
زولي الليلة والماضي وقديم التالد
زولي ال للرزيل بتغابى مو متبالد
زولي ال ديمة رمز العفة لابسو مقالد


بت الخدر

والع جمرو في جسدي المكبل وقايد
والوجع القسم احشاي ماهو محايد
الخلا الالم من جابو ســـــــــيرتك زايد
الريد في حشاي خمر قليبي مكايد


يس الشكري

تلهب نارو يوت في القلب مسالها مقايد
من زولآ ختر ما ظنو يرجع عايد
سابني مع النجوم اذكر لماها واعايد
كايس الطيبة الا طبيبي ذاتو معايد


بت الخدر

راحت كل سنيني وليا عز دهرها
ومآزيني القلب فكك الخبايا جهرها
منعول العشق سك الدموع ونهرها
بت الحيل وكفي رقيبتي شل ضهرها


يس الشكري
عشت سنين ضياع والدنيا ضقت قهرها
قابلت الخلوق والناس عرفت نفرها
منعول الغرام ال شق كبدي شطرها
سماها وسمومو عليا لسه اثرها


بت الخدر

يس يااخوي انا قلبي حالتو تشفق
مليان بالغرام والريد جناحو مصفق
عاشقي الطيفو زاير ولي ديمة مرفق
مشتاقالو شوقا فاض طفح متدفق



يس الشكري

وانا ياميدو سأل الله الكريم بي يرفق
ذاد عندي الغرام اصبحت أدي واسلفق
بقيت مرات اشيل انا عكسو مرات انفق
شوقآ فوقي كان دفس البحور بتدفق


بت الخدر

ويا يس اخوي انا حالتي ما مدسوسة
وبي ايات كتاب الله الحكيم محروسه
الخلاني في بحور العشق مغموسة
ريدتو الجوووة في نص القلب مغروسة


يس الشكري

يا ميادة حالتي انا ياها هي المدروسه
شاكي ال في الفؤاد دايمآ تجرًح موسه
تكلح في وتنتح عقربة وحرقوسة
ظاهرة الحالة باينة علي الجبين ملموسة


بت الخدر

سائلة الهي من حالي العلي يلفاني
يجمع شملي بالزول الغرامو سباني
الخلاني من حالتك بوح و بـــــــعاني
يايس كلامك كلو شــــــجن ومعاني



يس الشكري

سائل المولي من ريدآ سواك يعفاني

ريدها اياهو ريدي العشت فيهو اماني

ووكت الزول يخش في قلبو ريدآ تاني

تنبت من جديد في قلبو احلى معاني



بت الخدر

يايس عشوقي الربي نعس طرفو
سكر قلبي بي قولو ولزازة حرفو
الساعة مرورو الكون دة كلو بعرفو
بتقيفلو الخلوق تنشق عبيرو وكرفو


يس الشكري

يا ميادة انا وباقي الخلوق بعترفو

فيضك عمً للعامة ومقدم صرفو

حديثك كالبجر منو الجماعة يغرفو

مابنقص دوام الدرة واخضر جرفو


بت الخدر

طوّوول ليلي يايس غلبني انومو

واطياف العشوف في كل لحظة بيحومو

الختاني في قيحا بيقللي سمومو

عددني النجوم والهم جا كبّر كومو


يس الشكري

ليل العاشقين ياخنساء مابنلومو

زولو يعاني زي فاقد البقوقي بلومو

انا الدارس تخصص وارتويت في علومو

بكالريوس شرف حاشا ما دبلومو


بت الخدر

ماشفت السهر كيف نحن أثر فينا

والنم والشعر ياريتو لو بشـــــفينا

يامن انت عــــــــالم بالعباد الفينا

من كتر البكا وكتر النويح عـــافينا




يس الشكري

السهر الصعيب الفي طريقو حفينا

حاكينا السقد نوم العوافي جفينا

ياسيد السهر من السهر اعفينا

أجمع شملنا ودرب العوج كفينا


بت الخدر

طوووول ليلي يايس وما بالخاطر

والقلب الولف بقا في بعادو بخاطر

الخلاني جيتك كايسة تطييب خاطر

من ويل الفراق اضحت حياتي مخاطر



يس الشكري

معشوقي الجميل الما كسر لي خاطر

بحكيلو العلي مع انو يوت في الخاطر

عارف كل شي عني وبشوفو مخاطر

احفظو ياكريم من كل شر ومخاطر


بت الخدر

زولا فوق بطان الحلة عالى موهط

وطول الليل يضاير ويجبر الاتقصت

ما ببرا الكعوك وفى الفارغة ما بتنصت

فوق ديوانو ساسات الفريق اترصت


يس الشكري

زولتآ فوق فؤاد الشكري حيلها اتوهط

عركت صدرو بي ديسآ مسيرتو انقصت

وطول تلاطفو وبي خيالها اتبصت

هادا مناهو يا ميادة روحو اتمصت


بت الخدر

ياباسط النعم اسبلنى توب الستره

ومن عُقد الغرام يا الله حل العتره

الخلى الدموع حاكت مطرة النتره

ارحم ياحنين زيل الهموم والفتره


يس الشكري

قسمآ بالكريم ما دام معاي منسترة

ومن عقد الغرام اعفيني بنسى وبطرة

دموعك فوق خدودك ليها عندي القطرة

همك وهمي واحد زرعهن غرسهن والبترة


بت الخدر

زولا ياكريم آثر قليبي سباني

قابض في الفؤاد غازل غرامو وباني

انا العاجبني فيهو البافرح عباني

قربو المني الجاد بيهو ربي حباني


يس الشكري

زولتآ ياكريم والله جد عاجباني

عاجبني الفهم مصحوب جمال رباني

عاجباني النباهة البيها يوت سابقاني

عاجبني الحديث البي صراحة نهاني



بت الخدر

ياسابل السترعبدك هوحامد وشاكر

زادت مــحنتى وانا وجوى اصبح عاكر

الزول الهمام للي الجميل مــــــاناكر

دايرة نا قربو هسى الليله قبال باكر


يس الشكري

ياستار انا عبدآ شكرتك وذاكر

كفيني المحن كفيها شر الماكر

الزولة الدوام انا لي دروبها بحاكر

بيها اجمعني يارب الكلامه سكاكر



بت الخدر

زولا يارحيم قولو السمح هزاني

ومن قربو وحنانو اتحتحتن احزاني

العاجبني فيهو وفي القلب كزاني

قربو المني علاني وعقب عزاني



يس الشكري

زولتآ ياكريم آثارها في وجداني

مالكاهو الفؤاد مانعاه من زول تاني

العجبني فيها وجد كمان سراني

مني قريبة دايمآ واختلافنا مكاني


بت الخدر

زولا يارحيم بيهو الخيال حجاني

قولو المن هوايل الدنيا شال نجاني

العاجبي فيهو وفي القلب خجاني

ما ضقت السعد غير يومو داك الجاني


يس الشكري

زولتآ يالطيف فوق ذمتي وحايزاني

وانا لي قربها ديمه الحروف لازاني

العاجبني فيها اصلها ما مواخزاني

قربها غاية من الريد قليلة اوزاني


بت الخدر

دكتور القلوب كوس لي علاج او مشفا

لي جرحي المطول وبرضو رافض يشفا

الحسس العلي مابدور رقاد مستشفى

غير تجمعني بالمنو النحل شال رشفا


يس الشكري

يامداوي القلوب مرضي الحقيقة كشفا

جروحي مغورات قاصداني في تتشفا

السقم المعاي مااظنو زولو بيشفا

غير ليم البعيد الصورتو مي منكشفا


بت الخدر

ريدك يالهمام فى الجوف نحر شقاقو

ورانى النجوم وعيونى تب ما لاقو

المفرود هو فوق وصفو وجميل اخلاقو

ادعج طرفو كاحل خلقة من خلاقو



يس الشكري

الولد الهمام ريدك مكتًف ساقو

وراهو المرير مرآ كتل من ضاقو

المفرود صفاتو وبالصفوف عشاقو

اجمل من عيون ريل الهويد امياقو


بت الخدر

ديمة يخدر الفجة ان وطـــــت اقدامو

كل مايزيد صدود قلبي بيزيد هــدّامو

حاوي وسام وذوق راقي وجميل هندامو

سيرتو السمحة باقيا لو الفرش قدامو


يس الشكري

ديمة بقابل الحارة ان بقت اعدامو

والناس الجرارق تابا تلقى صدامو

أخوي ياميدو ربك بالوسامة أدامو

حرارةً راجيا من ناسو الورا وقدامو



بت الخدر

بيت الريد كبير خلق الله جت سكانو

والقابضو القلب من المحال فكاكانو

انا زولي البريدو الجد صعيب دكاكانو

سوا قليبي سلعة وباعو في دكانو



يس الشكري

ياريت بيت هواك تنهد جميع أركانو

ياتعب الفؤاد الزايدة في إمكانو

رجيت أيام لقاك كل السنين الكانو

لكن للأسف بقت الدموع في مكانو

بت الخدر
عضو نشيـــــــــــــــط
عضو نشيـــــــــــــــط

عدد المساهمات : 6
تاريخ التسجيل : 04/12/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مجادعة بيني وبين الشاعرالمبدع يس الشكري

مُساهمة من طرف Alshoukry في الأحد ديسمبر 11, 2011 11:43 am

دائما تأسرين قلوبنا وعقولنا , انت شاعرة متميزة من جيل جديد , لك اسلوبك الخاص الجاذب للنفوس.
تحياتي
تقبلي مروري ..
واصلي فنحن نتابعك
في انتظار المزيد
avatar
Alshoukry
المديـــــــــــــــــــــر العـــــــــــــــــــــــام
المديـــــــــــــــــــــر العـــــــــــــــــــــــام

عدد المساهمات : 169
تاريخ التسجيل : 18/11/2011
العمر : 26

معاينة صفحة البيانات الشخصي للعضو http://albutana.mountada.net

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى