مجاراة بيني وبيت المبدع علي عطية ابو ريش (العام الجديد)

اذهب الى الأسفل

مجاراة بيني وبيت المبدع علي عطية ابو ريش (العام الجديد)

مُساهمة من طرف ملسوع الغرام في الخميس يناير 19, 2012 10:57 pm

لخنساء بت المك

في العام ال فات كانت حياتنا عصيبة

كلـــــها غل نكد ووالآآآآم ولا بنحصيبة

يارب ياكريم احلام حــــــياتنا نصيبة

في العام الجديد مانلقى اي مصيبة



علي عطية ابوريش

في العام ال فات يبست اراضي خصيبه

كم اعوام مضت عين الجفاف بتصيبه

يارب يالطيف يا ذو العرش تنصيبه

آمالنا الملقحه ربي تم تخصيبه



الخنساء بت المك

عام اول قبيل ضاعت جميع امالنا

حصل الانفصال فرق جنوب وشمالنا

يارب يــــــــــــاكريم كتر رزقنا ومالنا

في العام الجديد طيب جميع اعمالنا



علي عطية ابوريش

عام اول يشيل من الهموم خمالنا

إلتهب الغرب فصل الجنوب تمالنا

يارب ياسند تاكلين عليك احمالنا

في العام الجديد تجمع تلم اشمالنا



الخنساء بت المك

العام القديم ولاّ انطوت صـــفحاتو

حت قلبي المعذب فـــارقِن وحاتو

يارب ياكريم كل زول يشوف راحاتو

والعام الجديد تملي الفرح ساحاتو



علي عطية ابوريش

سيارة العمر بتسير علي باحاتو

للعام الجديد غير نظام لوحاتو

يارب الخلوق بشرنا بي نفحاتو

يغشاناالفرح ويشيلنابين جنحاتو



الخنساء بت المك

عام اول مشى ومشت معاهو الزهجة

والعام الجديد عادت مـــــعاهو البهجة

يارب ياكريم الــــــهم حروفنا الوهجة

صحح قولا حسن فيهو نطق اللهجة



علي عطية ابوريش

عام اول رحل خلا النفوس مبتهجه

سائلين الإله نختا الكسر والدهجه

لا بنهجالنا زولا لا حروفنا بتهجه

اعمالناوكلامناعلي السنن والنهجه



الخنساء بت المك

في العام الرحل قول لي كيف اعمالك

احكيلي الحصل في السبتو والهمالك

في العام الجــديد يارب تشوف آمالك

تفرح وتـــــــنبسط يارب تخف احمالك



علي عطية ابوريش

متوتر دوام اعصابي ما بتتمالك

حنست الفرح قالي مالي ومالك

عاودني الأمل قالي يمين وشمالك

شوف العافيه والنعم الإله عمالك



الخنساء بت المك

عن عاما سلف كـــــلمني بس لو حبة

وداخل عام جـــــديد مليان سرور ومحبه

شاحدة الله الكريم فالق النوى من الحبة

تنعم كل سنينك وكــــــل من ليك حبه



علي عطية ابوريش

فاقد للبصيره وماني فارز الحبه

إتباطأالسعدفي دربي ماش إتحبه

ريدتن من جديدشايف القلب رحبه

غرام السمحة سمم جتتي وشحبه



الخنساء بت المك

وعام اول خـــلاس لحق السنين الفاتو

والعام الــــــــجديد جاي لنا بي زفاتو

ياسابل الستر تــــــدي القلب هفاتو

وتجمع شملي بالراقي الجميلة صفاتو



علي عطية ابوريش

متين علم السعاده يرف نشوف رفاتو

عام اول رحل كملن خلاس لفاتو

شاحدين الكريم يختانا من تفاتو

يوعدناوشريكي نحج نزور عرفاتو



الخنساء بت المك

عاما انطوي ومن العـــــمر ملفوف

والعام الجديد جاي لنا داقي دفوف

يارب ياكريم رافعينلك احنا كفوف

سهل امرنا وقّف فــرحنا صفوف



علي عطية ابوريش

عاما كان طويلا بالخطر محفوف

مارضني البعاد جوه الكبد متفوف

يارب ياكريم يامحلحل المصفوف

اجمعني وغزالي الضامر المهفوف



الخنساء بت المك

عاما فات وراح احداثو نتـــــــجارابا

كان لي فيو جروح لكني بس صابرابا

سنة ياربي سمحة تجينا نتـــسرابا

ادينا الفرح لامن نقول كترااااااااااابا



علي عطية ابوريش

جيبيلناالقوافي نشوف معاك نبرابا

عاما فيهو احزان كل دمار وخرابا

الكل شال سلاح اعلن قطع وحرابا

وطنا مصيرو مجهول حالتو مو ندرابا



الخنساء بت المك

العام المضا ولى انـكويتبو بـــــراية

وللعام الجديد ياخلي رافعة الراية

شاحده الله الكريم يلهمنا فيهو دراية

يدينا الـــفهم حكمة وعلوم وقراية



علي عطية ابوريش

العام المضى ولت جيوشو سرايه

عاما هل جديد متنمي فيهو صرايه

افوز بالسمحة ام خداكأنو مرايه

من حر السنين تبقالي ضل وضرايه



الخنساء بت المك

السنة روّحــــــــت والخلا بتحكوبا

وللعام الجديد ضــــابحنها المركوبا

جيب نضمك معاي يااب نمتا مكروبا

تهنية لي جميع حـــبانا في الراكوبا



علي عطية ابوريش

السنة روحت ابحر خلاس مركوبه

شايف الناس زهاجه وكلهم يشكوبه

ياست النميم الحالة جد منكوبة

جري النمة قلمك والمداد مسكوبه



الخنساء بت المك

السنة ودعت روّح خــــلاس ميعادة

والناس هيصت بي احتفال كالعادة

يارب الـــــــعباد ادينا فيها سعادة

قرب لي القلوب ياربي انهي بعادة



علي عطية ابوريش

السنة ودعت من تاني ماها معاده

طريت اللمة والونسه وطريتو قعاده

يالمزنه البتبرق في دواخلي إرعاده

بفتش ليك وكايس لي سماك مصعاده



الخنساء بت المك

العام الجديد هـــلن بشايرو وظهرن

وافراحو البدن ضون قلـــوبنا وبهرن

حياك الله يالبيك السنــين اذدهرن

عام الفين واتناشر كواكبك جهرن



علي عطية ابوريش

ودعنا القديم ايامو برضو إشتهرن

إنتفضت شعوبا رافضة ذلا وقهرن

مرحب يالجديد اسمعناسرا وجهرن

اطرد الآهة والاحزان كمان إتنهرن



31\12\2011م

avatar
ملسوع الغرام
عضو مجلس الإدارة
عضو مجلس الإدارة

عدد المساهمات : 191
تاريخ التسجيل : 23/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى