مجادعة بين بت الخدر و الشاعر منتصر الفكي

اذهب الى الأسفل

مجادعة بين بت الخدر و الشاعر منتصر الفكي

مُساهمة من طرف Eltyeb Elsadig في الأحد يناير 22, 2012 12:00 am

بت الخدر

قلبي اتبلا بي الما بخوفو الرصاص
وسيفو الدكري اليوت للفقر فصاص
للجارات يمين ماهو البكون بصاص
وفي النايبات حلولو كاملة مي انصاص

منتصر الفكي

قلبي أتبالا بالما أتوطت الحصاص
أتر أقداما يعجز فطرة القصاص
الشقت قليبي و قسمتتو انصاص
تحفظا يا كريم بالفضة و الرصاص

بت الخدر

عهدي معاك لآ اليوم المحدد قايم
ومسدار ريدي مهما كان حيحصل قايم
الخلا النفس مــــــقطوع ونازل وقايم
شوتّ هدف حياتي ودق فوق القايم

منتصر الفكي

المن نومو يا دوب الصبح كان قايم
زي زهر البنفسج في الأصايص قايم
قال لي المسا أنا من بلادكم قايم
لي بلد الأقام الدين و لا اليوم قايم

بت الخدر

الخلا الخلوق مبهورة شافو بريقو
ومن اسياف لحاظو قلبي ضلّ طريقو
الجحظ عيوني وحــلقي نشف ريقو
كلـــماتو القبيل قلب المحب بتعيقو

منتصر الفكي

الزايد و حايحي و فيني شابي حريقو
شفتو الليلة مارق من ضواحي فريقو
الخلا القلب في الريدة يبقي سريقو
من حور الجنان يصعب عليك تفريقو

بت الخدر

الاســـيافو ترمح في القلب تأزينا
من نار فرقو جيب قولك تعال عزينا
الخلا الكلام فوق الضمير حازينا
قلب العاشقين دايما نهايتو حزينا

منتصر الفكي

الجاهلة البتقدل في الدرب وزينه
معسولة لهيج رايقة و جميلة و زينة
يوت بالشوق قليبنا عليها ريد لازينا
يا الخنساء أن سرحنا إلا بس هزينا

بت الخدر

ياود الفكي اناعاشقي مــــااسماهو
القاب المكوك والساده هن اسماهو
الخلاني في قولي وغناي راسماهو
نورو يبق ولونو يشق وضوا سماهو

منتصر الفكي

قت لي خلي قبال يمشي لي اسماهو
ست ريدي البتسكن في القليب قاسماهو
فارد و شيها ديمة و ودعها الباسماهو
علا البقربا يا أخوي يوت حاسماهو


بت الخدر

و يا النمر التدك حصن البجيك هايننك
و يا طيب العشيرة اللي البجي ملايننك
يا الجودك طمح فوق الضيوف جايينك
ات الموت عديل للعاكسوك خايننك


منتصر الفكي

و يا ست الدلال خلقة و طباع زايننك
مالاقاني عيبا فيك قط شايننك
تفتني من سمعبك و البجي يعايننك
رب القدرة من عين الخلوق صايننك

بت الخدر


وياستار علي حــــالا عذاب ومشقّ

ريدا دك حصون عقلي وفطرها وشقّ
قلبي الفي غرام كم دروبـــــا شقّ
رجع مكسور متل عودا يبس وانشقّ


منتصر الفكي

لحظاها الطعن قلبي بسهامو و رشق
هالكلي القليب خلاهو رقد أتفشق
الزان خلقها و نحل جسيما و رشق
يجمع شملي بالفات نمرة 5 و عشق


بت الخدر

قلبي الفي غرامك شايفا بالغ وشذّ
وكل يوم ينادي عــــليك لسانو انحزّ
السلب المنام وسرق قليبي وفــــزّ
عبأ مكامني شوقا ليهو دفق ونــــــزّ

منتصر الفكي

الساكن قليبي و للعوازل خز
مياقو المدفع الساعت المحاصات رز
الخلا الرقاب في ريدو جت تتجز
هافو نحيل و سدرو تقيل و كفلو الهز

بت الخدر

الشاغل الفكر عاشقي المضوي براحو
قابض قلبي عندو ومابي يدي سراحو
الشيلني هم وانا قلبي خفت جراحو
من اسياف لحاظو كم خــــلايق راحو

منتصر الفكي

الشاغل الفكر زاد بالفراق أتراحو
لا كاتم العشق لا داير يبوح بصراحو
الخلا القلب يتشابى لي أفراحو
الفاه البيقطر عسل و بسكر راحو

بت الخدر

طال الليل علي وانا دمعي زارف وكبة
من البيــــهو عامر قلبي شوق ومحبة
الخلا الخلوق تبراهو وين مــــــــاشبة
عندو حضور كبير زي الفقير في القبة

منتصر الفكي

الداسيهو من الناس في قلبي مخبة
بالقرآن و أحاديث الرسول أتربة
لا بينم و لا يبقطع و لا يوم سبة
عارف الدين و هادي رصين دا من ما تبة

_________________

avatar
Eltyeb Elsadig
عضو مجلس الإدارة
عضو مجلس الإدارة

عدد المساهمات : 145
تاريخ التسجيل : 19/11/2011
الموقع : Alhasahisa

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: مجادعة بين بت الخدر و الشاعر منتصر الفكي

مُساهمة من طرف ود حليتي في الإثنين نوفمبر 12, 2012 2:34 pm

بنقول الصدق وما بنجامل حبة
قول بت الخدر والله زادنا محبة
دوبيتا رصين ما فيهو مثقال حبة
من شيتا يعيبوا ولا فضحلوا محبا
avatar
ود حليتي
عضو جديـــــــــــــــــد
عضو جديـــــــــــــــــد

عدد المساهمات : 1
تاريخ التسجيل : 12/11/2012

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى