مرابيع لي الطيب ود ضحوية

استعرض الموضوع السابق استعرض الموضوع التالي اذهب الى الأسفل

مرابيع لي الطيب ود ضحوية

مُساهمة من طرف ملسوع الغرام في الخميس يناير 26, 2012 7:17 pm

الدرب البجيب كمش النقود مو هيـّن

وما بمشيهو ديك بيتو اب جليدا لين

الولد البقوم من ام رشوم متدين

غصبا عنو يا الساحر يسوقهن بين





كم شديتا فوق أسد الخلا التغيان

وكم قرَّن لقاح لاعند جبال أسوان

مشيت الوحدة خيراً من جنين الآن

نهرت أب زِرّة يقول: معايا فلان





باتع في الدحيح يا الغول متيلك وين

ما تستاهل العورة وخسار العين

كتير مين فارق النزهة ورُضا الوالدين

الباقي الله .. يا هجام فريق أم زين





رايق لى البرايقني إن لقيت مُن راق

حنباق ما بعذر الروحو في الطقاق

عرّاق عِلا عرقاً يقعلو الخلاق

أنا متهوم في جرايماً أضعفن سرّاق





بعد سوق الردايف ولى السدر حِزامتي

دقيت المُقد ثروة ونقل فوق هامتي

دابي مسكت في الدرب البفرِّع شامتي

عدم النقدي فرق المنو رابطة قيامتي





ود المسمى الحوري

عوم براحة لا تكسِّر علي باصوري

الزول البدور ليمو وبيطفي حروري

بانت دارو يا أب فكاً بشابه اللوري





الليلة القرد أصبح محارب السوط

حر تريرو والكور سوى فوقو هيوت

على ال ما جالسن عيل يسولو شبوت

مرق مجحودو قال الليلة يوم الموت





الليلة السجن جابلو انكتامة وحرّّة

نحن جرارقو حدّث للجنين البرة

نحن البدور يكافينا الـ يعتّي الجرة

يخبر لي مراح حسب الله وين ما فـرَّ





الخبر البجي الصديق مقفل جوة

وأنا حالف ما بفوتو حت كان بقيت في هوة

عند كبس الدرق ما بنسى شرط الخوة

كباس في الدُهم فوق البقول يا مروة





جبدنا الحُقق من الدّمك سفينا

يابسين باسرر من اللحم خفينا

مكية بشير يا كيقا بتسلينا

مي مواحشانا وقعت حِفلة فوق كرعينا





الليل أمسى والنعسان جرايدو يدحن

كبس الهم علي السلّط قلوبن وحن

كضم الجرة سحار الغروب اتمحن

نعود سلمانة يا عمر الظروف إن صحن





أكل الشلخة لامن سنامه اتعتّى

شبح الحوري بى دقداق ربيلة وشتا

البرد النزل أنا منو كيف اتغتى

الجيل كله من سلمانة فرقاً شتى

أكل الخِلفة لامِن كمّل البــــاكريّة

شمخ الحوري.. لي كتلة عِريب بِت ريا

اكان ما اسكت الباكيات.. واخلف الكيّة

قولة (ابو فاطنة) يا الصادق خسارة عليَّ





الليل أمسى.. والكور حرّكنو مشيهن

عقبن (موية) والجبل اب قرود في وشيهن

حرّت جالستِن ود يُمّة ما بباريهن

لا (بلّاس) ولا عقُب (الجعيدي) بِجيهن





دردرنى الفقر لامتين بقيت شنكيب

ودنى الغباين لى جبال فرتيت

إمن جبت مالا فرح أم سوميت

وإمن فوق جبال تقلى إنجدع ما جيت





وقال

مانى الخايب البقول سويت

وما نهرونى عن ساعة السعال قريت

إن بردن قروش مانى البخيل صريت

وإن حرن بكار ماهن صفايح زيت





أكسر الهُربة سيلاً داوي

قلبك طفشو الصرّيع من العنجاوي

حلف يا الهايف أب كوراً بيرطن عاوي

اتح بك يوت على الفدعة أم حسيساً تاوي





ماني دغور بيوت بعقب بحل الصُرّة

ماني الخاين الـ بتبدك اخون الحرة

بختر ديمة في وسط الهجايم برة

داخرو ضراعي لي يوما حديدو مشرّا





يوماً بي مجالس أمات عروض بنفرّّق

ويوماً نحنا في العقبة اللهيبة بحرّّق

يا مسيكة البدِف من الدميرة مشرّّق

برضيك بي ردايفاًّ قلبي ليهن جرّق





من زمن الخليفة الحال بقت مرهونة

عضّام ناسنا راقدات في المشانق شونة

بالقيد والسجن يا احمودة ما بيهدونا

نحنا أخوان بريريبة الجزو..الدرفونة
avatar
ملسوع الغرام
عضو مجلس الإدارة
عضو مجلس الإدارة

عدد المساهمات : 191
تاريخ التسجيل : 23/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى