مجادعات بين المرحوم دفع الله العسيكري والتوم اللغا

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

مجادعات بين المرحوم دفع الله العسيكري والتوم اللغا

مُساهمة من طرف ملسوع الغرام في الخميس يناير 26, 2012 9:23 pm

أم فراً متل برق الدجي المساوي

نيران أم خدود إتلبسني كساوي

حكلية التراية الحارسا النمساوي

دوّر فوقا خلاني الضفادع أساوي





شتلة وادي شبرا الما بنوم نحاتا

حُراتا الفرانسة ومبدرين حشاتا

طقسها الليلة منها ما بفش كشاتا

من عين الحسود يسرلو ساكن شاتا





شتلة وادي شبرا الفي الزرع مفروقة

حُراتا الفرانسة وبالجلاد ماروقا

طقسها الليلة منها في التُقل والروقة

في جنات عدن يا خِلي ماسكة عروقا





شتلة وادي شبرا الزارعا إتعنالا

حُراتا اليهود عصفوري ما اتدنالا

من بدري الوكيت هبَّ النسيم هنالا

زادت نار أم لهيب العاشق إن غنالا





الليلة البريق فوق شبرا واتحالا

هيجت مقلتي والكبدة زاد إنحالا

آلاف السلام مني يوت يوحالا

يغشى مساء وصباح ويأتيني شيء من حالا





الليلة القعود سوى السفر في نيتو

طِـرا ناس النِّقينق وزوّدن جنيتو

البهم البتيتل بى فريق مكنيتو

هو اليعمل جناية أنا مستعد لى ديتو





ضربولنا الجرس متل العساكر جينا

نتّالب على الحاكم .. وليد ما فينا

قول للتاية و الرعنا أم شلوخاً زينة

عكيناها بالهاري السقايتو سنينة





يا هجام فريق اللى الوشاة ما لفّق

ترير عجلك على الكور اب نواصل شفق

يا طير الزرازير أب جناحا صفق

شيشك خسّر العاج حِبرك الإتدفّق





الليل حيلو روح وحس سروجنا يبنِّن

جدع النمة وداب زيد وصوتو يحنن

نحن الكسر النظرة عيونا تجنِّن

ديمة درقنا بي دم الرجال متحنِّن





حجار المقانص جيتو ناجع بارى

تلعب في هيوتك وجم قفاك متجارى

كان يا عاصى ما تسوى السفر قنجارى

ما بتسلى بى مكلوف على الدينارى





هبار الكفوف القاجّة دودو طافر

تر مسارعو هيّق فيها سالو مسافر

أكان ما يبقى خبك يا المفزّع وافر

بيش بدانى عابدات الشباب يا الكافر





عقب العقدة سحار الغروب الكافر

ناطح الما بقول جيبولى ولّا بعافر

الما قالو يا تيس قُنّة جنو ازافر

دنيت دوارو زندية وخبيبا وافر

قول لى طـه سيبك من نعاج وعمارة

الناس في بسِـط والقبلـة توقـد نارهـا

شاحد الله الكريم تكتَل حبش نُـقارة

من عدو لى صليح نبسط بريريب جارة





ما بتبّع لساني ولا رفيقو بعيقو

يا ستار على الفضحة الجنينا يضيقو

السجن البنسّي الزول تملّي رفيقو

نحن جرارقو والحار فوقو كلو نطيقو





ما يهمِّك فزع ناسا كُُتار منهدّة

زوزي ونسِّفي اللاعند الفنايد نــدّا

يعجبك عوسنا وكتين الضراع ينمـــدَّا

عودي الرقصة عقبان السما الينقــدَّا





مطيمير سِعدة ايدك جاتو حامي تريرة

ناطح البى غراما مجرِّعاني مريرا

فوسيبة الترى الاتمايحت فى قريرا

بينك وبينا يا العنافي قلعة ريرة





دهاريب الظلام والليل

أنا ما بهمني يا تيس انتبه في شليل

الدمّاعو جدول بي الدكاكر سيل

قِرِب يا داوي فضل منو واحد ميل
avatar
ملسوع الغرام
عضو مجلس الإدارة
عضو مجلس الإدارة

عدد المساهمات : 191
تاريخ التسجيل : 23/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى