مجادعه بين مصعب الصديق ومحمد ابراهيم ود الحلال

اذهب الى الأسفل

مجادعه بين مصعب الصديق ومحمد ابراهيم ود الحلال

مُساهمة من طرف ساري الليل في الأربعاء سبتمبر 05, 2012 9:50 pm

مجادعة بينى وبين مصعب الصديق
من محمد ابراهيم ود الحلال

مجادعه بين مصعب الصديق ومحمد ابراهيم ود الحلال

مصعب الصديق

انا العاشق البتول سنتين بريد كتامي

وانا الدوَاس مجرَب في الوقيعه حسامي

من تبيت وقم فارس جسور وعصامي

حلَال كربة اللاقوهو بالاعدامي





محمد ابراهيم ود الحلال


انا الابليس وقف دنقر رويسو امامى

قالى ارجوك يامخلوق وطينك سامى

شن قدرنى بى نضمك قصد انغامى
جنرال فى الشعر هتلر يحي مقامى



محمد ابراهيم ود الحلال



انا العاشرتو يالصديق دقيقه وثانيه

ما بنساهو فى الزحمه وسنينا الجانبه

الخصانى بى ريدتو و صداقتو الهانيه
اقسم لبهو من عمرى ورويحتى الفانيه



مصعب الصديق



جنات الملوك امات قطوفا دانيه
ماني بدورها كان اخسر حبيَب ثانيه
انا العاشرتو بديهو العوطف الحانيه
حت والتدو تصبح لينا اما تانيه



مصعب الصديق



لابارينا هيثم لا بنعرف السيما

اسياد فوق برارينا ونفوسنا سليمه

نحن بنعقر الوالدات نضيف ديمه
ما بنفضح شرفها المسرت هضليما



محمد ابراهيم ود الحلال



ما اتباشرت بالشينه و عملت جريمه

اخوك حى الله مسكينا قدرتو هشيمه

العادانى دون خلق الله نفسو زميمه
والخاوانى غير فى الله فاقد القيمه



محمد ابراهيم ود الحلال



انا القدمت من حر مالى حق الخوة

انا الكنكشت فى حبل الرجال بالقوة

انا الفضلت ضيف الهجعه تب لاجوة
انا الدايرنى فى الحال اليقول آمروة



مصعب الصديق



انا الحبيتا من عين الحسود دسوا

وانا الفاس البشق راس المصايب قوه

قشاش دمعة الحايره وبتبكي أخووا
كم زحيت جبال القبلي مازحووا



محمد ابراهيم ود الحلال



كم ناديت على الاسد الوحيش ومشيتلو

وكم ضايرتو فى الميدان عديل قشيتلو

كم كفكفت دماع اليتيم قشيتلو
وكم انصفت للمظلوم وكم فشيتلو



مصعب الصديق



الدابي اب درق جوه الححور خشيتلو

وملك الموت عشان ونسه صداقه مشيتلو

اتبسمت للحظ التعيس فشيتلو
وابليس اللعيس وجعتو زين حشيتلو





محمد ابراهيم ود الحلال



انا الاسد البخافو الناس وشيهو

وانا اللطاش والعدمان ولبهو

انا الهم البيوقد فى النفس اطفبهو
انا الزول البفش وجع القلب واشفيهو



مصعب الصديق



أنا ان لاقيت عنيتر بقلبو وبكفيهو

وانا الشاعر الرصين بفد حرف بكفيهو

خابر مسلك الصلاح وعارف الفيهو
الجن البودر.... بحرقو وبطفيهو



مصعب الصديق



جر النمه ... للشغلت دواير بالك

غني الفي الغياب تلقاها واقفه قبالك

شكرلي المحمده تنكتف بحبالك
دربي علي العرس يامحمد إت عقبالك



محمد ابراهيم ود الحلال


حليلك يالمودر وضايعه ساى حبالك

كترت العزل ناعم شديد غربالك

انا يا سيد الرجال الغالى تب قبالك
بنتين فى قفاى ياريت نشوف لعيالك



مصعب الصديق



كان شفتا الموهطه فوق سماحه وديسا

مابتنساها لامن غايتو يظهر عيسي

ميزان الجمال مابقدر أصلا يقيسا
عقلي وراها حاكى الكان شربلو مريسه



محمد ابراهيم ود الحلال



روولتى الراقي اسلوبها وعشيره انيسه

لافحه التوب عفاف خلقة اله لبيسه

الحافظانى فى روحها وجناها وميسه
وان جيت للحلا فوق لى نوال واليسا



مصعب الصديق



حسنها إكتمل سبق المعاها وفاتن

باقه خدودا ساكته وفوق عيونا مفاتن

ماخدا الكاس دوام ست الجمال الفاتن
فاتت ناس شكيرا وانجلينا وفاتن



محمد ابراهيم ود الحلال

---

تبين الحره من الخيل وكت لفاتن

دى مهرة بربر الخلت وراها رفاتن

الزاد للقلوب هن اقبلت رفاتن
ايديها التلوّح وحنه فى كفاتن



مصعب الصديق



انيت والأنين فوق جوفي انه وأنه

ومعزور القليب كان فوقا دوبه وغنى

ذي الحور تقول جات واقعه من الجنه
يبكي اسي ودموع كان شافه انصار سنه





محمد ابراهيم ود الحلال


--

وفاقد صبرى يالصديق و كيف اتأنه

الريده بيناتنا وقبيلك باركوها اهلنا

دام اللينه تقدل فى ضراى تتنه
يطير قلبى ويرك لامن نقضى زمنه



مصعب الصديق



دهب الخزانه الفي سويسرا اندقه

هيبه جمالو ذي نور الشموس البقه

رايق طبعو ماهو الصره وشو ونقه
خلَف ليا شوقا منو دار انشقه



محمد ابراهيم ود الحلال


--

ان قلنا الجمال رتبة مشير يترقه

وان قلنا الادب لى غيرها ما بتحقه

الخلانى راضى ولى هواها اتلقه
راقى اسلوبها يا مصعب كلاما منقه



مصعب الصديق



شافنا النججم فوق مقامه أتناطن

ماذي القبيل بعد الغروب انساطن

باسطه وفي العسل سكر حلات اتعاطن
إن مرقت عصير كل الفريق إتراطن



محمد ابراهيم ود الحلال


مى داب الفصلن توب الملامه وخاطن

ومى شبه الملن كاس القواله اتعاطن

سليلة الما بكن من العدم واتواطن

اماتا العزاز في الحاره ما بتباطن

avatar
ساري الليل
عضو مجلس الإدارة
عضو مجلس الإدارة

عدد المساهمات : 99
تاريخ التسجيل : 25/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى