ود الحلال يرثي والده

اذهب الى الأسفل

ود الحلال يرثي والده

مُساهمة من طرف ساري الليل في الخميس سبتمبر 06, 2012 9:49 pm

محمد ابراهيم ود الحلال

ود الحلال يرثي والده

____________
نفوسنا ملانه بالرضى والقبول والطاعه

وفقدنا ليهو زاده قلوبنا ايمانا معاهو شجاعه

صحيح العين بتنزف من فراقو دماعه

علا ابليسنا ماخدين ضدو الف مناعه

----

خلاس الدايره دارت بينا صرنا يتاما

بعد نعما كتار ضغناها منو وياما

رقد الكان حنين وواصل الارحاما

ابوى من بعدو ارواحنا وقلوبنا حطاما

----

الابكانا بى فقدو وحرق اعصابنا

ابوى العن مفاخر القوم معلى نصابنا

وكت الكاينه كانت وارتضينا مصابنا

ارحمو يارحيم فوق قبرو واتوصابنا

---

رفد الخيرو باسط وايدو مى مقلوله

ورفد العندو طيبه ونستو ميها ملوله

رقد المنو للاخوان صداقتو عسوله

رقد اسد الخلا المليان سماح ورجوله

----

دموعى الحرقن خدى وكونى

ما بجيبنو ابوى مهمن رونى

البى فرقو يامولاى كتلنى

ضاعف لى حسنتو وزيدو منى

------

ابوى الليهو بالدعوات اهاتى

ومن العبره انفتقت لهاتى

ابوى الفقدو مسخ كل حياتى

اريت لو بادل اليوم بى مماتى

---

الرجل البسيط صافى النفس والنيه

البكا والنويح ياريت ارجعو ليه

الفى الدنيا لا لام لا جاتنى منو ازيه

ثبتو فى السؤال درجات تلحق ميه

---

شقاق فجاج الخوف وسبد القوة

اللاقاهو شاف صره جبينو اتحوة

نفسو نضيفه روحو خفيفه شيال خوة

ابوى خلانا فى البكا والنويح نتلوى

---

والبارح مساهر وما غمد لى هسه

فاترحيلى مزروب والقيام اتقسه

القله المنام يا الله مابندسه

ها السكن التراب اصبح عليها وامسه

--
رفع الفراش والصدقه والتاسوعه

قبل اليوم بشوفن ليا مى مشروعه

سالت الليهو ارواح الخلوق مرجوعه

يدخل والدى فى الجنه ويدنى فروعه

---

بوى الكرمو من الجيب وتشهد ايدو

ابوى الطيبه والاحسان قلادة جيدو

ابوى اللى صلات خلق الله مالى رصيدو

ابوى يا الله يارحمن ثوابو تذيدو

---

قبايل العيد وكت دانن خلاس يايابا

زادن حزنى فبك ضعفين ونص يادابا

الناس فى فرح بهجه وسرور تتشابا

واسباب السعاده انا يانى قافل بابا

--

ناس تتشرف ألعيد القريبه ايامو

فطروا عجاله للاسواق سريعن قامو

انا المغبون وحظى معاهو اللا صيامو

كيفن يفرح الفاقد اعز ارحامو

--

ابوى الفارس الباراهو بيهو اتطامن

ابوى الموت كتير لاقاهو يوت قدامن

ابوى الجنبو سيمات الجبان ماحامن

ابوى الفقدو يوم بكت السحابه اتزامن

--
البرق الشلع تحت السحاب واتفرع
خلى قلوبنا ترجف والرعد يتكـــــرع
الخلانى ساجد للكريم واتضـــــــرع
طريت الفقدو حنضل ومنو كاااع اتجرع"
---

ابوى تبكيهو دمعات الكتار اخواتو

ابوى العمرو ما شال الملامه حياتو

ابوى الوصفو بكر الكل ابوه واماتو

ابوى العاش صغير لامن شهدنا مماتو

--

بوى البالع الزعل العليهو وماكل

ابوى الما جلس فى لمه من ها الشاكل

وحات الفيهو كل احزانى رامى وتاكل

ابوى بيدارق الشبنه ويضارى مشاكل

---

ابوى من تب لامن مات خدم بضراعو

ابوى الشاخ وما فارق كلتشى كراعو

ابوى ألماترك لى شغلو رغم اوجاعو

ابوى يا الله حسسن فى مراقدو اوضاعو

--

حليلو الكان كبير الاسره بعد ابواتو

حليلو العمرو ما كبّر مقام لى زاتو

حليلو المارقص فى داره وسط اخواتو

حليلو الفات وصبحت دارنا صى بوفاتو

---

كاشفه امورو ما دسدس كلامو ونكرو

كل البينو بين خلق الله واضح زكرو

ابوى يوم ربو بالموت الحقيقى افتكرو
ما خلالو شيتا فى جواهو احتكرو



---

ياعيد الفجيعة العبره فيك واقفالنا

مفاتيح الفرح راحت كسرنا اقفالنا

فى الملهى القبيل ساعه حشرنا اطفالنا

طرينا الفقدو ناااار بى هينه آبتطفالنا

--

كان بيبخبخ الارياح علينا اولادو

سخى واجواد كريما من زمن ميلادو

كان فى العيد يهاتى على البعيده بلادو

راح خلانا للزكري ولحق ميعادو
__
ونسه وقرقراب لمت كتار فى دارو
شله وكوم اهل ما بلهنى من تزكارو
مفقودين قبيل لما الكريم اختارو
جت واصلنو شن فايدة زيارة الزارو
___"
رمضان قولو دام اخترت ابويا تشيلو
ابقى عليهو عشره وسر رضاك افشيلو
كان من رحمه او غفران شبع احشيلو
حوش عنو ام دخان بى جيهتو لا تمشيلو
____
"الفارقتو فى الزايله ام قدود الفانيه
اجمع بيهو فى الجنه ام قطوفا دانيه
الربانى من عرقو ولقمتو الهانيه
تغمدو يارحيم بى رحمه شامله وآنيه
_________
خدودى الديمه بى سيل الدموع مرويه
ما بجففها غير ربى القدرتو قويه
فراق السيرتو طيبه وروحو يوت عفويه
سبب لى هبوط فى دورتى الدمويه
______

avatar
ساري الليل
عضو مجلس الإدارة
عضو مجلس الإدارة

عدد المساهمات : 99
تاريخ التسجيل : 25/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى