في وصف نساء البطانة

اذهب الى الأسفل

في وصف نساء البطانة

مُساهمة من طرف ساري الليل في الإثنين سبتمبر 24, 2012 10:32 pm

أبوعبيدة رقم الله
في وصف نساء البطانة


--------------------------------------------------

النساء في البطانة ليهن مكانة خاصة ومكانة كبيرة وليهن الاحترام اياهن امات الرجال الفوقن النضم السمح واخوات الرجال البسندن الحيل ونسوان الرجال الحاسبات عداد ايامهم ما سون الشينة وما اتعيرن بي كعب ولا فاتن الحد.
نسوان اهل البطانة ماسكات ادبهن وسارحات بي غنمهن حرات وعفيفات وعد ما قت فيهن ما بوصفن الا كما وصفت عمت الخزين (والخزين ولدا عاجب اهلو ولمن كبر كاسو ليهو لي عروس اتحزمن عماتو واختو وركبن حميرن ومشن لي حيها وجابن ليهو الخبر) وصفت ليهو عمتو العروس :


كان القسمة يا ود الرجال بيضا
تختم وتعرقن كافة بنات حوا
خفيفة في الغرق تنقز كما الريشا
تقيلة في الحديث لامن تقول بكما

وبخيتة اختو بعين الاخت والضرة جابت فيها كلام توصف في السماحة والرشاقة :

ان وقفت عديلة وان مشت مبرومه
وان قدلت معجنة في الوسط مقسومه
ان قعدت موهطة وآآآ قساوة القومه
مبرومة حشا عجوة محس قدومه


وفي وصفها لي ترباية البنية وواجب بيتها ومطبخها سردت ليها قصة طويلة عن تجربة شخصية:


اما الحصل وصلتنا ختولنا الفطور
والراسية كانت ماها في
قت ابقي حايمه قدمها فار
تاريها في مراح الغنم
بتلاوي في يد البهم
بتوسم الداير وسم
تعلف او تحلب تجز وتصرهن
وتعلف القرم الخضار
شافت حميرنا مربطات
نفضت ايديها من الغبار
غشت الكمينة وبحتت
جات شايلا كانون ماليا نار
سالمتنا واتحكرت قلت
بي روقة بي مهلة وسرار
تنت بكريها ودنت
صديتو زي لون الحمار


ودا مثال بسيط لي النسوان في البطانة والمجال فيهو واسع والكلام فيهو كتيرقالو فيهو الشعراء وفتروا مسادير ودوبيت رباعيات شكروا واتغزلو .................... اها جماعة خليتكم في وصف مرت الخزين وحاجيكم لي وصف شغبة الكاهلية وهي صنف اخر من نساء البطانة.....ونواصل

عقلك يا ابعصب كل فن حاويهو
حت النت بقيتو كورة تلعب بيهو
كل الصورللماسك الحجر بايدهو
اكرمك ربي كل عام تحج ليهو


وقبال شغبة خلونا نميل شوية مع صورة ابوعصب الذكرتنا اهلنا هناك وخلتنا نمش لي كلام بشري فوق التاية "التقول هي جنب الحفير ديك" وبشري من شعراء البطانة ولان المسدار برضو في سيرة نساء البطانة وجات مناسبتو بنقولو ليكم وهو مسدار طويل فيهو نضم سمح بالحيل ومفردات اهل البطانة واضحة فيهو ما دايرالها شرح :


التاية= بشري
من زمن عاداتنا والطبع الجميل
والتاية شوفتها قاسية تب
بت بادية ذات اصلا اصيل
والتاية خريف
سعية
انقيب
وحوار وشيوم ورحيل
جاها اب ضراع والغيث نزل
القبلي رف
وسحاب يشيل
ناشقين وقاصدين الخريف
حزيم حفائر والوادي سيل
والتاية طربت للرحيل
شدولا فوق جملا مهيل
حزمت عفيشها البلزما
قربة وسعن
بخسة وكهيل
شنطة مستفة ملح وشطة
بصلات في بقجة
وصرة ويكة
علبة فيها المرواد والمكحل
الابرة الخيت الدهب التيل
دبليبة وروب
الزاد ترياق القائم
ودربو طويل
غادرولك العطوة الدغش
اجراس ترن برايها خيل
ساقو الضعينة وقبلو
اخواتك الماهن عويل
وصلو ونزلو عصيرا هالك
والتاية فكولا الحكار
مرقت تتاتي مع الحمار
فرت مع الغنم الشقر
بتدرج البهم الصغار
وتقوقي زي قمري الفرع
تتني في نص العدار
ديسا البصارع في القصب
متدلي لا عند القصار
واتحكرت نص التبر
حواليها راتعات البكار
وكل ما النسمة تداعب النال
التايه تكون مسرورة بال
التايه عشيه سماها
انهضلم عام
سحاب داوي الرعد
البرق الشال
طربانة ورافعة ايديها تضرع
ارحم بلداتنا واعدل الحال
...................ونواصل




أبوعبيــــــــــــــــدة
شبكة ومنتديات ود الفضل


عدل سابقا من قبل ساري الليل في الإثنين سبتمبر 24, 2012 10:36 pm عدل 1 مرات
avatar
ساري الليل
عضو مجلس الإدارة
عضو مجلس الإدارة

عدد المساهمات : 99
تاريخ التسجيل : 25/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: في وصف نساء البطانة

مُساهمة من طرف ساري الليل في الإثنين سبتمبر 24, 2012 10:34 pm


شمس الدين عبدالله (أبوألق)

لاقانى الحبيب فى اجمل ماتكون الصوره
باهى الطلعه متل القمره المكمله دوره
وكان القسمه فى غيرا أكان ركب ماسوره
ومعاها بت عجرم تفوت والله فيها البوره


لاقانى الحبيب أريتو مالاقانى
قال لى سلام لخبط على كيانى
بقيت كل ما أظبت موجه ألقى محطتو مشاركانى


راسيه وأديبه عندك فوق ندايدك فوت
ضربك للعشوق فليخ سيوف موسوط
ناس ود دقمه متلى مهددين بالموت
متل كورة الهلال شاتت قلوبن شوت

زولى الانضف من دهب العجم فى اللون
وأبيض من قمر عشره البضوى الكون
عملت قلبى كوره ورتبتلو العون
مره تشوتو آوت ومره جوه القون



يا ودالنور دا كلو فوق (....)المابقدر اقول اسمها عرفتها مش؟
بالمناسبه دى فى بعض الشعر الفوق دا من تأليفى الخاص ولسه فى كتييير
مع تحياتى:
أبوألقSmile
avatar
ساري الليل
عضو مجلس الإدارة
عضو مجلس الإدارة

عدد المساهمات : 99
تاريخ التسجيل : 25/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى