مجادعة الوليد الاغبش و التوفيق ود رحمة

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

مجادعة الوليد الاغبش و التوفيق ود رحمة

مُساهمة من طرف وليد عبدالرحمن في الإثنين نوفمبر 05, 2012 3:08 pm

توفيق
نحن البين الشعوب صنعنا مكانه
نحن كما البحار تهدر وكت هيجانه
نحن اهل الطيبه للبكوس لي رضانه
نحن بنجيب تارنا قبال نسوي عزانه

وليد
نحن ولاد جعل ولينا في الدوابي مكانة
ثابتين في المصايب وحاشا مابتانة
وكت الحارة تعمر و تنطق الجبخانة
نعجا ونسوطا ونجعل نداها سخانة

توفيق
نحن معا الكرم معروفه فينا جساره
مابنهم لي عدو وارواحنا ماها خساره
سودانيه سود وعزه ماسكه مساره
نفخر بي البلد ونحفظ جميع اثار

وليد
همباتة وغبش في الحارة مابنضارة
ناس عكة وطرب في العرضة مانا شتارة
يوم تعج العجة وتنقر النقارة
نكسر للعنق كسراً معاهو حقارة

توفيق
نحن مسؤولين عن الوطن المعظم شانو
وفي ساحات القتال اولادنا تب ما لانو
رافعين الكفوف لي غير المولي مابتهانو
وماشفنالنا نمرا مسكو المهيم زانو

وليد
نحن كرمنا وااافر وتعددت الوانو
صوتنا مع الضهر ناقط لهب قطرانو
ثابتين في اللسان وللعهود ماخانو
نشبع ضيفنا تب لحماً يعج دخانو

توفيق
نحن مدارك الزمن الفجر بركانو
ثابت عزنا مابقولو ديل اكانو
البلد العظيم نفخر نكون سكانو
مابنفرط في شبر من جميع اركانو

وليد
نحن سعنا عامر بي لبن الطيور خججانو
نحن صغيرنا ماضاق لي حلات دلاعانو
الزل والهوان ناحيتنا ماهو مكانو
لاحقين لي عدونا نمشيلون محل ماكانو

توفيق
نحن حرقنا لي اسماعيل جميع اعوانو
نحن بنسند المحتاج والناس الكمان بيعانو
نحن العز نشتري ومابنسعي لي بيعانو
لاالحين الوطن بنشوف بريق لمعانو

وليد
نحن صغيرنا مابان عليو ميعانو
لا فلفل شعيرو ولا جرب كان مسحانو
الخاوانا يبشر يلاقانا تب اخوانو
والعادانا نطرب بى لحن سرخانو

توفيق
مابتصعب علينا الدنيا لبن الطيور حالبنو
همباتت زمانا سيفنا البحد سالنو
فوق دم العدو بالحمار باللينو
والقلب البحن من الصدر حالنو

وليد
كيـــف مــــا نفتخر بي عـزنا الشايلنو
دا الدود البكاتل جلدو الرهيييف سالخنو
ان قلت الرجالة فارشين الجمر واطينو
وكـــان قلت الكــــرم ماعونا تب مالينو

توفيق
نحن اسود جرارق الخوف يمين ناسينو
وفي ساعة الكتال قوش القراد دايسينو
وان قلته الكرم كم من مراح عايسينو
ومابتلقنا يوم توب البخل لابسينو

وليد
ناساً ناس كرم بابنا ماسادينو
ناساً ناس اخوة صديقنا ماخايننو
نعز الجار وضيفنا تب شابعنو
الزل والهوان ناحيتنا تب مانعنو

توفيق
همباته وملوك كل الشعوب عارفانه
وان داير تشوفنا اطراهو شكل الدانه
ان قلته الكرم تلقي العورب حفيانه
في خدمة ضيوف تضبح تشد خرفانا

وليد
لينا شهامة معروفة هينا براااانة
الطيب والكرم والسمتة برضو معانا
كان خاويتنا ابشر بالكرم تلقانا
وان عاديتنا حرررم تشرب الجبخانة

توفيق
مابنتحدر علي خلقا دون مسبه نهينا
حافظين الحقوق وعارفين كمان اللينا
القشاهو الزمان والنفسو فيها ضغينا
بنضيفو علي الضغاين المدفونه في وادينا

وليد
الاهتمام بالناس من الخصال الفينا
حاشا ما بنتجاهل الرايدنا والحابينا
والقايل نفسو غاااالي وبالعشق كاوينا
تتقدا السماء ومايهز كرامتاً لينا

توفيق
نحن بلدنا هو البلد الجوانحو وسيره
نحن قيمنا دانت لي القيم تاثيرا
نحن سيوفنا تقطع للرقابو عسيره
سودانيه سود سمحه وسماحة سيره

وليد
نحن بلدنا بلداً مستحيل تفسيرة
نحن أهل للكرم وناساً نعز الجيرة
نحن اولاد تماسيح يشقو دميرة
نحن الموت والكتل في عرضنا بتيرة


وليد عبدالرحمن
عضو نشيـــــــــــــــط
عضو نشيـــــــــــــــط

عدد المساهمات : 8
تاريخ التسجيل : 23/09/2012

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى