مسدار ودمدني للشاعر/ جبارة الحسن الصائغ

استعرض الموضوع السابق استعرض الموضوع التالي اذهب الى الأسفل

مسدار ودمدني للشاعر/ جبارة الحسن الصائغ

مُساهمة من طرف Alshoukry في الأربعاء نوفمبر 23, 2011 5:02 pm

من ودمدني قام في الجلوس ركابو
زايد السرعة من ساعتو ومسك ديدابو
الخلاني كل ما اذكروا اتلهابو
داير نظرة في الزول السمح ترحابو

سكة القطار
من ودمدني قطع السكة قام متحدر
شايل لصغيراً لي صفايا معكر
الخلاني سهران ليلي كلو أفكر
راضي ضميري من الحاصلة مو متننكر

التجارب
قام من التجارب وانحدر لي سافل
شايل لي لطيفة القامة مو متغافل
فيكي ملامح الشاف الحيامة وجافل
أقيفوا سوية يا اسيادي التصلوا نوافل

الحليماب
قرب للحليماب ماشي زايد السرعة
شايل لأم جمالاً فيا نارو بترعى
نبيه سواقو ما كمل أبنصي السرعة
عجلان بالطريق كلباً موالي الشرعة

المجاديب
حصل في المجاديب بالطريق عجلان
حِس بوريهو زي عزف الوتر رنان
شايل لأم جمالاً حير الأذهان
يحفظك الكريم الواحد المنان

حليلة البلال
ماش بي سرعة جاتو حليلة البلال
ومن اليوم فقد صبري ومنامي انشال
سرعة شديدة فاقت مية الأميال
ما فات للورا وقدامو إلا علال

القريقريب
حصل في القريقريب يبحت الحصحاص
سرعة شديدة ما تمثلها للرصاص
قرب سرعة الصوت يا المسمى الباص
فوتك للمعاك زي المغنطيس مصاص

البطحاني
يا البطحاني جاتك يا العليك القبة
شايلها الكل ثانية ياخد شبة
ما بفوت حاجة للقدامو حالا طب
وازن السرعة زي تِعل الخريف الصب

الدوينيب
حصل في الدوينيب الكتار طلابو
شايل للخرب قلبي وفتن أحبابو
حازت للجمال فوق الأصول قادلابو
فيكي ملامح الجكة ومسك ديدابو

ودالفادني
ودالفادني جاتك يا العندك النوبات
شايلها المكلف في الطريق بحات
شبهك من نشيت ما شوفتو في الجيهات
فيكي ملامح الشاف الحيامة وشات

ودهجا
حصل ود هجا فايت تلت بوريهو
ما سخن فتح كبوتو عاين ليهو
شايل للمتبر والجمال كاسيهو
قلبي امانة عِندك اوع تلعبي بيهو

العمارة
قرب للعمارة أب قزازاً صامت
خاتف السرعة سواقو الفرامل غامت
تلت بوريهو للقدامو جابو يعامت
شايل للقطع خشم العزول والشامت

أم دغينة
شارف لأم دغينة في ثواني قليلة
زايد السرعة واقِعت الدرب ما بشيلا
للقدامو يغرف ويدي ليه بالكيلة
تسمع صوتو زي الساقية ساعة الشيلة
الحصاحيصا
في الحصاحيصا وقفت والخلوق بتعاين
ظاهر من وسط ركابو يلمع باين
فاتو جمالك المن نورو والعة رتاين
كضاب البقول غير نظرة فيهو بعاين

أبوفروع
من الحصاحيصا قام يدب لأبوفروع
شايل للخرب قلبي وعمل لي روع
مخلوف الدناقلة البي الكفل مردوع
عديلة قنايتو بس في قامة المربوع

قنب
قنب جاها شايل للحماني اروق
مشغول فكري حيران كل ساعة اتوق
فاق لخدرة المزروع جرارقو السوق
رشاقة ورقة داخل قلبي عملت سوق

الطالباب
قام من قنب الطالباب بيدني بعيدا
القدامو في لحظات بيقفل قيدا
أنا يا اخواني تايه عندي حيرة شديدة
جيد الصيد بعيد ما بمثلوه لجيدا

أبوعشر
حصل في اب عشر ماشي المكنتو جديدة
عندو القرية من القرية ماها بعيدة
شايل لأم جمالاً درة غالية فريدة
يا رب العباد فوق العليها تزيدا

ودالماجدي
ودالماجدي جاتك يا العليك الراية
شايلها المحكم في بنايتو سراية
في نظريتي يا المزروعة في التراية
لونك فاتو يا الدرة الجمالك غاية

أم دقرسي
قام فوق أم دقرسي وقرب الكاملين
ويلحق للبعيد قدامو رمشة عين
شايل لأم جمالاً مافي ليهو تنين
من نظراتو أبرد ضربة السكين

الكاملين
في الكاملين وصلت وحالتي حالة شينة
فاقد قلبي للزول القعدتو رزينة
البكا والنويح ما بفشوا ليهو غبينة
في وداعة الله يالدرة الجمالك زينة

كلكول
أخد الهدنة في الكاملين قصد كلكول
القدامو في لحظات يجيهو يجول
شايل للمتبر راسي حاقي القول
ما بقيف في الطريق لأي زول مجهول

الحليلة
يا شيخ الحليلة يا التحل الضايق
أقيف بسرعة للزول أب جمالاً فايق
أحفظ للمعاها كلهم للسائق
يوصلوا بأمان ما يشوفوا أبداً عايق

الكسمبر
قرب للكسمبر سرعة فايتة الحد
احفظ ليها يا ود الترابي الجد
مجدوع الطريق الفاتو ما بنعد
زي كلب الشرعة غير سيدو ما بنصد

ودالترابي
يا ودالترابي يا أب صلاحاً بين
جاك شايل يفرق في الطريق ويهين
يوصلوا بأمان زولي النغيمو حنين
قاطع قلبي بسلاحو المعاهو يزين

أبشر والغابة
شارف للحليلات أبشر والغابة
زايد السرعة عجلان في الطريق يتشابا
تلت بوريهو نغمات زي وتر ربابة
تسلمي إنتي تاني والباقي كلو خرابة

البشاقرة
حصل في البشاقرة مخوي زي مندوف
شايل لأب نغيماً حالي مو ملهوف
أب قلباً صميم عندك يدخلو الخوف
طاقة جسمه فاقت للحرير الغوف

التكينة
قرب للتكينة وبالظلط متداعي
تلت بوريهو حذر للنيام والواعي
مسيكة الكتة حاملة حيامة الشراعي
ما ظنيت أشوف حيك واحوم بكراعي

أم مغد
قرب لأم مغد بي سرعة غير عادية
شايل ليها قوسيبة الجزيرة النية
فوقك هيبة الفارس الوراهو سرية
والله إن كتل أسبابو من عينيا

ألتي
قرب ألتي ضارب بوري للقدام
شايل للمحارب النقرة والحوام
مسيكة الكتة قبال ياخدا العوام
احفظ ليها يا ود عيسى أبقى إمام

ودعيسى (المسيد)
يا ود عيسى يا شيخ العلم جاياك
بريريبة مقاطعة حيامة الشراك
من العين تقيف ليها وتكون في حماك
يا أهل الصلاح أنا كل سفرة معاك.

النوبة
عند النوبة زاد السرعة غير أسباب
احفظ ليها يا شيخ الطريق الكاب
شايل قمره داخل البص مع الركاب
اول نظرة فارق قلبي مني وغاب

المسعودية
مسعودية قرب ليها ماشي شديد
وشايل لي بريريبة سكونها هويد
كل ما أذكرك في الحين جنوني تزيد
يمكن نظلمك لو قلنا زي الصيد

الجديد عمران
ماش بي سرعة حصل في الجديد عمران
حويتك رجال كسلا العظام في الشان
فوقك هيبة أب دبورة وأب نيشان
معدوم المثل في راية أي مكان

سوبا
قام من الجديد حصل حليلة سوبا
ماثل سرعة الميج البيتحكوبا
كان لي نفسي من اليوم عزمت التوبة
ما برد السلام لزراعة البادوبا


بتري
حصل بتري ديك خلاها لا قدام
وسرعة زيادة ماثل لي صواريخ سام
من الساعة ان جنيت ما بنلام
جوابي معاهو كانت سنة الاسلام

الإمتداد
جا في الإمتداد بسرعة القانون
ماشة الحركة في العربات على كم لون
شايل لأم لهيجاً مَسخ المشنون
أنا روحت ما دام عاودني عيون.

العمارات
قرب للوصول لف العمارات غرب
شايل لأم جمالاً في الحساب ما ضرب
فوقك هيبة الفارس الملاقي وجرب
كل الشافا في الحين زح قلبو اتخرب

الخرطوم

في خرطوما نزلت ركبت الطراحة
وين نتلاقى يالدرة العبيرك فاحا
كرهنوا الجمال كل المعاك في الساحة
في وداعة الله يا الدرة الجمالك ماحا
قصيدة للشاعر / جبارة الله الحسن الصائغ / رحمه الله واسكنه فسيح جناته
avatar
Alshoukry
المديـــــــــــــــــــــر العـــــــــــــــــــــــام
المديـــــــــــــــــــــر العـــــــــــــــــــــــام

عدد المساهمات : 169
تاريخ التسجيل : 18/11/2011
العمر : 26

معاينة صفحة البيانات الشخصي للعضو http://albutana.mountada.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى