مسدار الشراد

اذهب الى الأسفل

مسدار الشراد

مُساهمة من طرف ملسوع الغرام في الأحد يوليو 07, 2013 6:58 pm


مسدار الشراد
للشيخ والشاعر والاستاذ عبد الله ود حمد ود شوراني




اب تقزي الحكار امو الفحل مو فالتو
مربوط عده شهرينو ودخل في تالتو
الخلاني مجنون ليلى افوق فوق حالتو
سمحا مستحق تعب المغادر نالتو


منسول العنانيف الوبرتو نضيفة
قللو الشراب سيتلو العليقة خفيفة
الخلة البثلج عندو مني مخيفة
فاهما معتني وسمحا طبيعتو عفيفة


ياتيس رزمي المزرقن راعدو
خشبك دقو من ذورك جناحك باعدو
سيدك كان يتم املو وظروفو تساعدو
عازم بكرة حوا لام شديدة يواعدو


سهرانا مساقد وجفني مايقو لجوج
احسب في النجوم والعادي جنبي يسوج
جسم المنو لي جمر الكمين مفجوج
دهب برته وحرير نافشه وقطن محلوج


الشراد يناتل في الرباط حد ليلو
عارف النية سفرة وليها شامخ حيلو
الشاغل الفكر تاتاي مشي ووحيلو
ناير ونادي عالي علي الشباب اسكيلو


ارجيت الفجر ود عيني جافي منامو
صليت الوكت هام بي الشديد وقيامو
انا والمقدر البدأ بالهياج وزيامو
عابيين سفرة للنيلة السحابة وشامو


بعد الشاي وعمل القهوة للتلتاوي
قم شرعلو رسنو الفي ربطبتو بلاوي
الخلتني اهبر الشاية من الداوي
سدرا شاب وردفا للملابس طاوي


ود الحوري والرقاب منسل عايد
نوختو وبرك تيس الوحيش القايد
كان مايبقى يالشراد عبارك زايد
مشوارن بعيد دكك الطبايعو حمايد


ود العانس التحويرو سمح صوفتو
شديتو ولشق طوفو وحدر مخلفوتو
قصدي الليلة دهب البرتة اشوف منسوفتو
قبال فوقنا صقط المصري تقرن فوقو


سرج المقدر اللشقة الطواله عراقبو
لديت غردو لبيتو وكرب لو محاقبو
اسمع يالحساب السبعة جدل عاقبو
سيدك قصدو مرواح الغرامة مراقبو


ود اب صيده وجه بالمسافات شاق
عقب السوق وابو النافلة وقهوة اسحق
ناطح مهرة العرضة ام نحاسا داق
ظريفة جميلة ديسة علي الحزم كلاق


درع فرشي فوقو وخلفت الساق
وقام بي تاب هجيني النايبو باقز شاق
رحيل العفرت البراقو لفضو سياق
ساهو علي عجوة المشرق الدفاق


ود جمل الشدايدة المقدر الخباب
قبض الدرب ولفخ الحلة والهاشماب
علي الحاوية الجمال والعفة والاداب
غزة وفزة رحل جالسة ام كراب


شب فوق النخيلات الضراعو صميم
فات حد السيالة وعزازة البنزيم
علي ياقوتة الدر النفيس واتيم
مصع الكوعو شارد وعز حرارتو قديم


ضراع واسع العتمور شروفو وصيو
مدة وقدة فات حسان وذولة حيو
ناطح الخلة بصري النوم مجافي صبيو
وحلا ردفو شاكيات التياب من طيو


نسل الحوري جمل الكاهلي ود حاج حامد
حبوباتو تسعة عزاز حسابن جامد
قفة وخفة لي بلد المعانس عامد
عارف سيدو مصحبلو السهر مو غامد


الخلاني انسبوا لبي نوايبو يغامد
كتل الصيدة جدو طرد صباح مومرامض
الشراد فلانة الحاوية كل محامد
اهجم دوره صبح ناري جمرها خامد


من ميعة حديد ختر الكذاذي مقفى
قصدوا ليلة لي موعد فلانة يوفي
علي برنجية الجيل للبقيس ويصفي
شال راسو وزعل اخد الرسن من كفي


الشراد بعد وخر علو القنطور
تراك الليلة عندك مدة ماك مختور
هجيم ام وضيبا مروي خمر وعطور
عليك مابيقسى ياتيس العلو الممطور
avatar
ملسوع الغرام
عضو مجلس الإدارة
عضو مجلس الإدارة

عدد المساهمات : 191
تاريخ التسجيل : 23/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى