مجادعة يس الشكري وعلي عطية ابوريش

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

مجادعة يس الشكري وعلي عطية ابوريش

مُساهمة من طرف ?????? في الإثنين أكتوبر 07, 2013 3:34 pm


Yassin Alshukr

الشعر المحبب والنفوس بتريدو

الغزل العفيف يا ابعلوة نحن وريدو

القالوه ناس قيس هسا نحن نعيدو

وفوق قولهم كمان بندور حديثنا نذيدو



علي عطية ابوريش

نجرالنم علي الظبي المبوح جيدو

خابرك ياللصم نظم الحروف بتجيدو

من بحرالكلام در القصيد بنصيدو

إيقاعآ مدوزن حالي في ترديدو



Yassin Alshukri ؛؛

جلسة بن وكل فنجان يسوق مربوعتو

ببدالك براي كل زول يصف مفدوعتو

قمرآ ذيدا عشرة أيام عليها ربوعتو

ترا الاول دوااام و الباقي كلو تبوعتو



علي عطية ابوريش

شربناالبكري يايس وهاك مربوعتو

إن درت الوصف تلقاني ليك موسوعتو

عاشقي الأهيف المقسوم وسط مربوعتو

من صوتوالطروب شال القماري سجوعتو



Yassin Alshukri

سمحات الطوال أمات رقاب وضماير

الكفل المرفع و الخديد الناير

الجيد المفدع و السدير الداير

يس الحلف غيرن عقب مو داير



علي عطية ابوريش

سمحات الطباع امات سبيب وضفاير

سلبن عقلي يايس وحاتك حاير

من لوعة فراقن وغل زماني الجاير

خايف في التجاني الماحي اصبح زائر



Yassin Alshukri

ياابعلوة الكلام مو في السماح وطباعو

الشي الشفتو أدهشني وفؤادي أراعو

متعجن حديثو وتمشي واحلة كراعو

زي قمر الهجوع والأخريات أتباعو





علي عطية ابوريش

شفت خصال وشفت جمال كتير انواعو

مالاقاني شبه الراسي في اوضاعو

جمال الناس تلت عندو التلات ارباعو

ضايع في دروبو وغيري شله الضاعو



Yassin Alshukri ؛؛

أختلف الشباب في النشأة والفكرية

أيهما تريد بدوية أم حضرية

هل سمحة البتمرق للشغل فجرية

ولا المن صباحها تصبلك البكرية





علي عطية ابوريش

بدور بت العزاز ام سكتن دغرية

وين ماتبقى بت الناس دوام محرية

بدور الشدت الجبنة الصباح باكرية

بدور النازلة من جنة عدن حورية



Yassin Alshukri ؛؛

كان المولى يسرلك وجدت أنيستك

أخبر يا علي سكنك أريني مدينتك

سودانك وسيع اسرح معاها مخيلتك

أختار البقاع الطيبة وازرع طينتك



علي عطية ابوريش

الحكم الجميلة الواضحة في ترنيمتك

تعبر لينا عن اصلك طباعك وشيمتك

ماشرطي البلاد لكن بقوي عزيمتك

إختار بي تريث ما توسخ جينتك



Yassin Alshukri

نفترض الزواج تم و بديتا حياتك

أنجبت الصغار والدنيا بالخير جاتك

كيف تنوي الرباية بنيتك وو ليداتك

ضربآ بالسياط أم بي جميل كلماتك



علي عطية ابوريش

الجاهل عجينة تعجنو إت بي ذاتك

ربيو بي مهل حقق عليهو الفاتك

أرجوك يااخوي عشان تخف اهاتك

قلل من خيالك وإفتراض نماتك



Yassin Alshukri

سابع مستحيل كان تلقى حدو خيالي

وذات المستحيل النمة كان تابالي

نواصل ياعلي وهاك السؤال التالي

كيف فهم العفاف أمات حديثأ حالي



علي عطية ابوريش

علي مد الأفق حبل الخيال مدالي

من بحرالحروف كأس النميم عبالي

اجاوبلك صراحة ارد ليكا سؤالي

مادايرات كتير ياصاحبي خش طوالي



Yassin Alshukri ؛؛

أخوك يا علي و مابفتخر بالشينة

لكن عندو فهم الشفتة والمسكينة

البت المفتحة جات تسيني إضينة

طلعت كيسا فاضي وخت عليها جنينة



علي عطية ابوريش

لو عكران مزاجي ونفسي شاحه ضنينه

بلسم ردي للطيبه الرقيقه حنينه

والعاجباهانفسها تفتخر بي سنينه

ليها لساني يقطع زي سيوف النينه



Yassin Alshukri

ان جافاك حبيب لا تطل عليه الطله

تصغر عندو قيمتك وتبقى ليكا مذله

ان بقى زول بريد من ريدو ما بتخله

يسأل في غيابك كل ضل ومحله



Yassin Alshukri ؛؛

حنضل مر فراق المبتليبو وصابر

موارك حيرتو والهم الدوام متكابر

أمد الفرقة طول والعشوق مو خابر

العينين بتزرف و الكسر مو جابر



علي عطية ابوريش

ان محبوبي عرًج من دروبي وضله

برخيلو العنان بديهو راحتو ادله

كان أكد جفاهو وبي عهودي اخله

مابرجعلو تاني وروحو كان تنسله



علي عطية ابوريش

بي حسنو وجمالو ولون جسيموالتابر

إستوطن قليبي وطيفو دايماعابر

ديسوالإنبهل لا شامبولا زيت دابر

يحفظو ربي من العين اقول ياجابر



Yassin Alshukri ؛؛

داير بت تكون فيها الصفات ألآتية

شامة خد نعومة ورد ومشية متاتية

تسر نظر الكفيف كان أدبرت كان آتية

صفرا وذات ضمير ماها المكرشة عاتية



علي عطية ابوريش

معشوقتي العشقتها من نقايص خاتية

عزيزتآ في النسب تحفظ شرفها وراتية

كان ألقاها وإبتسمت حظوظي مواتية

بتقصرلي طول زيف الليالي الشاتية

??????
زائر


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى