مجاره بين عدلان محمد ابوريش ؤ جمال عثمان ود جادالكريم

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

مجاره بين عدلان محمد ابوريش ؤ جمال عثمان ود جادالكريم

مُساهمة من طرف جمال عثمان ود جادالكريم في الأربعاء نوفمبر 19, 2014 11:05 pm

عدلان محمد ابو ريش

الزارع غرامو وريدو في الصمام
بي دمي العزيز ساقيهو مماقام
كان الحظ يحالف وتبسم الايام
يشفى قليبي من جرحو المنوثر وسام

جمال عثمان ود جادالكريم

ظبيا ليهو احاسيس قلبي واقفه نظام
وقل فيهو ساحل عيني لا رمش لا نام
المكتوبلي ريدو وعزاب غرامو السام
متا ياخالقي ليهو تجرني الاحلام

عدلان محمد ابو ريش

المابسمع عليهو دعاية ولا كلام
مهما الفرقه حالت بينا مافي خصام
شبه اللريل الضارب فؤادي سهام
ضغيرآ عمر ياداب فات 11 عام

جمال عثمان ود جادالكريم

عاشقي الوشو زي قمر السبوع التام
ما بقبل إشينو سمعتو في الاعلام
العمرو سته زايد سبعه حاسب تام
يرعاهو الكريم بالبقره و الانعام

عدلان محمد ابو ريش

الفي رده مابسمع حديث وقواله
هلكت روحي عمدآ واستحالي وصاله
المن غيره عايش في ظروف بطاله
شن لي غير حنيني ودمعتي الهتطاله

جمال عثمان ود جادالكريم

كتير الغيرنا يا عدلان لاك جمر ملاله
اضحة روحو في حب زليخه وهاله
الشاغلات قلوب ناسن شموخ وبساله
مجبورين نريدهن رقم هادي الحاله

عدلان محمد ابوريش

وين الذي سماحه محال ومافي امثاله
خلقت ربنا السواهو ايه جماله
قاسيه علي البدوره عنيده قاسي مجاله
ياود جاد كريم عشمك قليل في وصاله

جمال عثمان ود جادالكريم

جلا جلالو في صور الجمال خصاله
انعم خدها ؤمن حور جنانو رثاله
مهيرة المغربي الما جالست سفاله
ياعدلان اخوي ما تقول نصبي حلاله

عدلان محمد ابوريش

الفايته البنات حشمه وسماح وعفافه
عجز القال بوصف غلبتو اوصافه
الذوق والادب سمحة طباع وقيافه
كذب القال حصل في ىوم مفاتنه شافه

جمال عثمان ود جادالكريم

راسيه اديبه وسمحه عاليه اردافه
عندها قدله منظومه وتتاتي زرافه
الحايزه المحاسن خلقه زوق وظرافه
كبدة نوق بشاريه النفيس ما بعافه

عدلان محمد ابوريش

الدعجه العيونه كحيله ضامر هافه
ديسه دماس ليالي الظلمه فايت اكتافه
البسمات در ذي البروق الرافه
فايق لونا لون التبري ذايده نضافه

جمال عثمان ود جادالكريم

تحسب 100 في التيلاد عفاف اشرافه
سدرها عالي مفدوعه وقفاها مسااافه
مبرومة الضمير العينيها بيخفن الكشافه
راقيه وفاهمه لدروس الحياه وشفافه

عدلان محمد ابوريش

ديسك ليل سوادو وللخصر مددلي
يا بدر التمام الفي سماك متجلي
درب الريد علي قاسي وصعب يسهلي
غيرك لا بكون لا من هواك متخلي

جمال عثمان ود جادالكريم

فاهك نطقو زي عسل النحل متحلي
ريقك منو لي جبنة فطورنا ....نحلي
يا شبه الزجل الحامل رسايلو ...يدلي
كان ما فوزبو ريدك اقول اجن احسن لي

عدلان محمد ابوريش

ياعقد الضمير انسي الحزن وانحلي
وبالصبر الجميل عند الصعاب اتحلى
بالصايبو الغرور في الدنيا ماتتملي
ماتفكي الطريق الصاح تتوهي تضلي

جمال عثمان ود جادالكريم

اقدلي بي محاسنك يا الضميرك ملي
ارصعي قلبي بالاسهام ولي لا تجلي
غازلي دواخلي ايضا"عن فراقي اتخلي
لا تهجريني انصاب عقلي بالكلكلي

جمال عثمان ود جادالكريم
زائر


الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى