محاورة بين عكير الدامر والنفس

إرسال موضوع جديد   إرسال مساهمة في موضوع

استعرض الموضوع السابق استعرض الموضوع التالي اذهب الى الأسفل

محاورة بين عكير الدامر والنفس

مُساهمة من طرف ملسوع الغرام في السبت نوفمبر 26, 2011 7:23 pm

محاورة بين عكير الدامر والنفس

عكـيـر الدامـر

تقل سمع الأضان والعين كساها طشاش
بقت العمـة شـيـب بــدل الكـرب والشاش
يـا نفــس السـواد لـمـتين ورا الغشـاش
مسـوّيك ليـه شـبكة وبمـلا فيـك حشاش

النفس:
غشاش منه البملاني وأنا تابعاه
بـردخ لي أوامره تقـولوا لي طايعاه
كـلامك أحفظه ما سامعــاه
شيبك مالي بيه اليتبع النافعاه

عكير:
أول حاجة غشاشك نجس ملعون
اسمه إبليس وبي غضب الإله مطعون
أخير ليك فكي دربو بلحّقك فرعون
توبـي وقولي يا مولاي تكون في العون

النفس:
باب التوبة فاتح ما بخلي هـواية كل يوم
ليله خمرة ومزة بالشواية
ما بين سادة كاحلة وست جبين ضواية
كل يوم فـي طرب.. يا حفلة ولاّ رواية

عكير:
نعم التوبة مفتـوح بابها قولي مستوفي
لكن أوعي تنـسي الفـي المقادير مخفي
هاكي سؤال بسيط جاوبيني لو بتعرفـي
هـل ضـامناه عمرك وعارفة يوم تتوفي

النفس:
دا الشي البدري عارفه وعمـري ما ضمناه
قمت على الطرب عاشقاه بتمناه
قبالك كتير اللامنا واللمناه
دار إيدنا اليمين بي شمالنا سالـمناه

عكير:
ما دام في المعاصي مشددة ومكروبة
ولسع جارية في درب أم حدق وأم روبة
يقّـني لي لامحن ـا دام مسكتي دروبـه
وابشري بي عذاب الآخرة يا المخروبة

النفس:
عـذاب الآخرة عند الله ومخير فيه
صـراف البلا البعفي المريض يشفيه
كل زول بي طريقـته بيسعى لي ترفيــه
ما تسلّط على ضوك أخير تطفيه

عكير:
ويلك يوم تفر الروح تقضي تبارحك
وأملاك الجليل بما عملت تصارحك
يمروا ليك فضايحك فـي ليالي مسارحك
خوف تتبكمي وتشهد عليك جوارحك

النفس:
ليه تتمنى لي الويل وكل شـنية
إيه سببك معاي عملت فيـك جـنية
معاك من يوم بلوغك ريد وحالة هنية
إيـه الليلة جدّ عليك سواد النية

عكير:
السبب إنت عارفاه الفساد يا خاينة
يا المنك علي كم مرة حصلت كاينة
عيونك للمحرم ديمة طايرة معاينة
ماك خجلانة يا الانداية رايتك باينة

النفس:
صبرت وقلت تتراجع شوية تفكر
تتحاشى الوحل بيصبحك متوكر
نقطة نظام وخليك منتبه متذكر
انت شريكي ما تغبى وتكون متنكر

عكير:
كان أنا ليك شريك وشراكة جد معقودة
من الليلة حليت وحرقت عقودا
جعـلتك لي عدو ونارا تَوِجْ موقودة
وعـديتك قتيلة وتربتك مفقودة

عكير:
ينبوع البلا الما بتنحسب نكـتاتك
من إبليس هواك وملعبه حركاتك
السوسة البينكت في القلب نكاتك
جايبة الهوان مات الدخل شبكاتك
avatar
ملسوع الغرام
عضو مجلس الإدارة
عضو مجلس الإدارة

عدد المساهمات : 191
تاريخ التسجيل : 23/11/2011

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى